முகமது பின் ரஷீத் குளோபல் முன்முயற்சிகள் காசா சுகாதாரத் துறைக்கு 37 மில்லியன் திர்ஹம்கள் வழங்குவதாக உறுதி
UAE:
முகமது பின் ரஷீத் மக்தூம் குளோபல் முன்முயற்சிகள் காசாவின் சுகாதாரத் துறைக்கு ஆதரவாக 37 மில்லியன் திர்ஹம் ($10 மில்லியன்) வழங்குவதாக உறுதியளித்துள்ளது .
ஹமாஸுக்கும் இஸ்ரேலுக்கும் இடையிலான போருக்கு மத்தியில் காசா பகுதியில் வாழும் பாலஸ்தீனியர்களுக்கு, குறிப்பாக குழந்தைகளுக்கு அடிப்படை மருத்துவப் பொருட்களை வழங்க இந்த நிதி பயன்படுத்தப்படும் .
புதன்கிழமை சுவிட்சர்லாந்தின் டாவோஸில் நடந்த உலக பொருளாதார மன்றத்தில் உலக சுகாதார நிறுவனத்துடன் இணைந்து இந்த உறுதிமொழி எடுக்கப்பட்டது.
முகமது அல் கெர்காவி, MBRGI-ன் செயலாளர் நாயகம் மற்றும் WHO-ன் இயக்குநர் ஜெனரல் Dr Tedros Adhanom Ghebreyesus இடையே இது தொடர்பாக ஒரு ஒப்பந்தம் கையெழுத்தானது.
காசா பகுதியில் உள்ள பாலஸ்தீனியர்களை ஆதரிப்பதற்கும், போர் நடந்து வரும் நிலையில் அவர்களின் அடிப்படைத் தேவைகளைப் பூர்த்தி செய்வதற்கும் இந்த உறுதிமொழி எடுக்கப்பட்டதாக அமைச்சரவை விவகார அமைச்சராகவும் இருக்கும் திரு அல் கெர்காவி கூறினார்.
முற்றுகையிடப்பட்ட பகுதியில் உள்ள பாலஸ்தீனியர்களுக்கு மனிதாபிமான உதவிகளை வழங்குவதில் ஐக்கிய அரபு எமிரேட்ஸின் உறுதியான அணுகுமுறையை இந்த நிதி பங்களிப்பு உள்ளடக்கியதாக அவர் கூறினார்.
உயிர்காக்கும் மருத்துவப் பொருட்கள், உபகரணங்கள் மற்றும் சுகாதார வசதிகளை இயக்குவதற்குத் தேவையான எரிபொருள் ஆகியவை தேவைப்படுபவர்களுக்கு வழங்கப்படுவதை உறுதிசெய்யவும் இந்த நிதி பயன்படுத்தப்படும்.
மேலும், எமிரேட்ஸ் ரெட் கிரசென்ட் காசா பகுதியில் உணவுப் பொட்டலங்கள், கூடாரங்கள் மற்றும் குளிர்கால ஆடைகளை தொடர்ந்து விநியோகித்து வருகிறது.
