UAE: ஒருங்கிணைந்த போக்குவரத்து மையம் குறிப்பிட்ட சில வாகனங்கள் அபுதாபிக்குள் நுழைவதற்கு தற்காலிக தடை விதித்துள்ளது. அபுதாபிக்கு தொழிலாளர்களை ஏற்றிச் செல்லப் பயன்படுத்தப்படும் லாரிகள் மற்றும் பேருந்துகள் போன்ற கனரக வாகனங்கள் அபுதாபி தீவுக்குள் நுழைய தடை விதிக்கப்படும். இந்த தற்காலிகத் தடை டிசம்பர் 1, 2023 வெள்ளிக்கிழமை முதல் டிசம்பர் 4, 2023 திங்கள் வரை அமலில் இருக்கும்.
ஷேக் சயீத் பாலம், ஷேக் கலீஃபா பாலம், முசாபா பாலம், அல் மக்தா பாலம் உள்ளிட்ட நுழைவாயில் பகுதிகளில் டிசம்பர் 1 ஆம் தேதி மதியம் 12 மணி முதல் டிசம்பர் 4 ஆம் தேதி அதிகாலை 1 மணி வரை சில கனரக வாகனங்கள் செல்ல தடை விதிக்கப்படும் என்று அதிகாரிகள் தெரிவித்தனர்.
இந்த தற்காலிக டிரக் தடையில் இருந்து பொது சுகாதார நிறுவனங்கள் மற்றும் லாஜிஸ்டிக் ஆதரவு சேவைகள் பயன்படுத்தும் வாகனங்களுக்கு விலக்கு அளிக்கப்பட்டுள்ளது. சாலையைப் பயன்படுத்துபவர்கள் எச்சரிக்கையுடன் வாகனம் ஓட்டவும், போக்குவரத்து விதிகள் மற்றும் விதிமுறைகளைக் கடைப்பிடிக்கவும் ஆணையம் கேட்டுக் கொண்டுள்ளது.
தற்காலிக கட்டுப்பாடுகள் ஐக்கிய அரபு எமிரேட்ஸ் யூனியன் தின விடுமுறை கொண்டாட்டத்துடன் ஒத்துப்போகின்றன. அரசு மற்றும் தனியார் துறை ஊழியர்களுக்கு டிசம்பர் 2 முதல் 4 வரை நீட்டிக்கப்பட்ட வார விடுமுறை அளிக்கப்பட்டுள்ளது. டிசம்பர் 5 ஆம் தேதி (செவ்வாய்கிழமை) வேலை மீண்டும் தொடங்கும். பொதுத்துறை ஊழியர்கள் டிசம்பர் 1ஆம் தேதி வெள்ளிக்கிழமை வீட்டில் இருந்தே பணியாற்றுவார்கள் என்பது குறிப்பிடத்தக்கது.
