காசா பகுதியில் அணுகுண்டு வீசிவது குறித்து பேசிய இஸ்ரேலிய பாரம்பரிய அமைச்சர் அமிஹாய் எலியாஹுவின் அறிக்கைக்கு ஐக்கிய அரபு அமீரகம் கடும் கண்டனம் தெரிவித்துள்ளது . இந்த அறிக்கைகள் சர்வதேச சட்டத்தை மீறுவதாகவும், அத்துடன் போர்க்குற்றங்கள் போன்ற சர்வதேச மனிதாபிமான சட்டத்தின் கடுமையான மீறல்களை செய்ய தூண்டுவதாகவும் மற்றும் இனப்படுகொலை செய்யும் நோக்கத்தின் தீவிர கவலைகளை எழுப்புவதாகவும் உள்ளது என்று ஐக்கிய அரபு அமீரகம் கூறியுள்ளது.
இது தொடர்பான ஒரு அறிக்கையில், அணு ஆயுதங்களைப் பயன்படுத்துவதற்கான அச்சுறுத்தலை ஐக்கிய அரபு எமிரேட்ஸ் திட்டவட்டமாக நிராகரிப்பதை வெளியுறவு அமைச்சகம் (MoFA) உறுதிப்படுத்தியது. குடிமக்களின் உயிர்களைப் பாதுகாப்பதும் அவர்களுக்குத் தேவையான மனிதாபிமான உதவிகளை வழங்குவதும் உடனடி முன்னுரிமை என்று ஐக்கிய அரபு அமீரகம் வலியுறுத்தி வருகிறது.
இந்நிலையில் எலியாஹு நேற்று “மறுஅறிவிப்பு வரும் வரை” அரசாங்கக் கூட்டங்களில் இருந்து இடைநீக்கம் செய்யப்பட்டார் என்று பிரதமர் பெஞ்சமின் நெதன்யாகுவின் அலுவலகம் அவரது கருத்துகளுக்குப் பிறகு தெரிவித்துள்ளது.
மேலும் உயிரிழப்பைத் தடுக்க உடனடி போர்நிறுத்தத்தின் அவசியத்தை அமைச்சகம் மீண்டும் உறுதிப்படுத்தியது, சர்வதேச ஒப்பந்தங்கள் உட்பட சர்வதேச சட்டங்களின்படி பொதுமக்களைப் பாதுகாப்பதன் முக்கியத்துவத்தையும், மோதலின் போது அவர்கள் குறிவைக்கப்படாமல் இருப்பதை உறுதிசெய்ய வேண்டியதன் அவசியத்தையும் வலியுறுத்தியது.
ஆக்கிரமிக்கப்பட்ட பாலஸ்தீனப் பிரதேசத்தில் நிலைமையை மேலும் மோசமாக்குவதைத் தவிர்ப்பதற்கான முயற்சிகளை தீவிரப்படுத்தவும், மேலும் ஒரு விரிவான மற்றும் நியாயமான அமைதியை அடைவதற்கான அனைத்து முயற்சிகளையும் முன்னெடுத்துச் செல்லவும் சர்வதேச சமூகத்தை ஐக்கிய அரபு எமிரேட்ஸ் கேட்டுக் கொண்டது.